Në Shqipëri, gjatë 24 orëve të fundit janë raportuar 35 vatra zjarri, nga të cilat pesë mbeten ende aktive dhe tri janë nën kontroll. Për përballimin e situatës janë angazhuar 382 forca operacionale, 40 automjete zjarrfikëse, si dhe 90 efektivë dhe tre helikopterë të Forcës Ajrore. Në disa zona si Dajt, Pukë, Malësi e Madhe dhe Gramsh, forcat vijojnë punën intensive për shuarjen e flakëve, ndërsa është evakuuar një familje në Pukë për shkak të rrezikut nga zjarri. Autoritetet theksojnë se nuk ka rrezik për zonat e banuara në shumicën e vatrave, ndërsa Agjencia Kombëtare e Mbrojtjes Civile vazhdon monitorimin dhe koordinimin me strukturat lokale për të mbrojtur jetën dhe pasurinë e qytetarëve.