Instituti i Kosovës për Drejtësi (IKD) ka njoftuar se aktiviteti i planifikuar për mbledhjen e nënshkrimeve në Prishtinë, në kuadër të nismës për ndryshimin dhe plotësimin e Kodit Penal, është shtyrë për shkak të kushteve të pafavorshme atmosferike. Mbledhja e nënshkrimeve do të rifillojë të hënën, ndërsa IKD-ja falënderon qytetarët për mirëkuptimin e treguar. Nisma synon që moszbatimi i vendimeve të Gjykatës Kushtetuese të konsiderohet vepër penale dhe të sanksionohet penalisht përdorimi i parasë publike për përfitim elektoral gjatë periudhave zgjedhore. Pas Prishtinës, mbledhja e nënshkrimeve do të vazhdojë edhe në komunat e tjera të Kosovës, me qëllim mbledhjen e të paktën 10 mijë nënshkrimeve për procedimin e nismës në Kuvend.