Instituti Hidrometeorologjik i Kosovës ka paralajmëruar se ditët e para të javës do të sjellin kushtet biometeorologjike kryesisht të mira, por me mundësi reshjesh lokale, breshëri dhe erërash të forta në disa zona. Këto reshje do të jenë të dobishme për kulturat bujqësore, megjithatë duhet pasur kujdes për rrezikun lokal nga fenomenet ekstreme. Nga mesi i javës pritet një rritje e temperaturave, veçanërisht gjatë orëve të mesditës dhe pasdites, duke shkaktuar ngarkesë termike të shtuar dhe nevojë më të madhe për ujitje të kulturave bujqësore si misri, perimet dhe pemishtet. Autoritetet rekomandojnë shmangien e ekspozimit të gjatë në diell, përdorimin e kremrave mbrojtës dhe ujitjen e bimëve në orët më të freskëta të ditës për të përballuar kushtet e nxehta dhe rrezatimin e lartë UV.