Ndryshimet klimatike po ndikojnë në mënyrë të drejtpërdrejtë tek shëndeti i punëtorëve të ndërtimit dhe fermerëve, të cilët janë të ekspozuar ndaj temperaturave të larta dhe kushteve ekstreme të motit. Specialistët e mjekësisë së punës paralajmërojnë se këto kushte sjellin jo vetëm probleme fizike si goditjet nga të nxehtit dhe dehidratimi, por edhe shqetësime mendore si eko-ankthi dhe eko-depresioni. Rreziku rritet sidomos për ata që punojnë pa mbrojtje adekuate dhe pa kontrolle të rregullta shëndetësore, ndërsa ndotja e ajrit shton kërcënimin për sëmundje të frymëmarrjes dhe kardiovaskulare. Ekspertët kërkojnë masa më të rrepta dhe rregullore të sakta për punën gjatë orëve më të nxehta të ditës, duke theksuar nevojën për mbrojtje reale dhe jo vetëm rekomandime.