Në Malishevë, një nga zonat më të prekura nga rriqrat në Kosovë, ky vit po shënon një ulje të ndjeshme të rasteve të pickimeve nga këto insekte. Banorët e fshatit Carallukë raportojnë se situata është më e qetë dhe rastet janë kryesisht të vogla, pa ndonjë infeksion të regjistruar deri më tani. Komuna e Malishevës, në bashkëpunim me institucionet qendrore, ka vazhduar me masat e dezinsektimit në zonat më të rrezikuara, duke ndikuar pozitivisht në kontrollin e përhapjes së rriqrave. Faktorë si moti më i ftohtë në fillim të vitit dhe ndërhyrjet e veterinarëve kanë ndihmuar që numri i pickimeve të jetë shumë më i ulët krahasuar me vitet e kaluara, kur raste të tilla arrinin deri në mbi 800.