Gjatë 24 orëve të fundit në Shqipëri janë regjistruar 40 vatra zjarri, prej të cilave 6 mbeten aktive, ndërsa 25 janë shuar plotësisht dhe 9 janë nën mbikëqyrje. Në terren janë angazhuar mbi 490 forca vendore dhe lokale, si dhe Forcat e Armatosura me 133 efektivë, helikopterë, automjete zjarrfikëse dhe mjete të tjera për të kontrolluar situatën. Vatrat aktive ndodhen kryesisht në qarqet Tiranë, Dibër, Shkodër dhe Fier, ku po punohet intensivisht për shuarjen e tyre, ndërsa në qarqet Lezhë, Elbasan dhe Korçë situata është më e qetë. Agjencia Kombëtare e Mbrojtjes Civile dhe strukturat e tjera mbeten në gatishmëri të plotë për të mbrojtur jetën dhe pasuritë e qytetarëve, duke vijuar monitorimin dhe ndërhyrjen në zonat e rrezikuara.