Komuna e Skenderajt ka nisur evidentimin e dëmeve të shkaktuara nga moti i keq dhe breshëri që goditi zonën një ditë më parë. Drejtori i Drejtorisë për Bujqësi, Pylltari dhe Zhvillim Rural, Sabit Ferizi, së bashku me ekipin e tij, ka zhvilluar vizita në terren në fshatrat Vajnik, Burojë, Likoc dhe Izbicë, ku janë konstatuar dëme të konsiderueshme në kulturat e drithërave, pemëve dhe perimeve. Vetëm në Vajnik janë dëmtuar rreth 60 hektarë me grurë, ndërsa fermerët kanë nisur dorëzimin e kërkesave për vlerësimin e dëmeve. Komisioni Komunal për Vlerësimin e Dëmeve nga Fatkeqësitë Natyrore do të dalë së shpejti në terren për të përgatitur raportin, i cili më pas do t’i dërgohet Kuvendit Komunal dhe Komisionit Qendror Qeveritar për shqyrtimin e mundësive të kompensimit financiar për fermerët e prekur.