Një stuhi e pazakontë rëre ka përfshirë ishullin turistik të Santorinit, duke sjellë erëra të forta dhe masa të mëdha pluhuri nga Afrika e Veriut që kanë ulur ndjeshëm shikueshmërinë dhe kanë përkeqësuar cilësinë e ajrit. Autoritetet lokale kanë bërë thirrje për shmangien e lëvizjeve të panevojshme dhe përdorimin e maskave mbrojtëse për qytetarët dhe turistët. Në pjesë të tjera të Greqisë, si në Kretë, pluhuri saharian i kombinuar me reshje të forta ka ndikuar në trafikun ajror dhe detar, duke detyruar vonesa dhe devijime fluturimesh si dhe bllokimin e trageteve në port. Shërbimi meteorologjik grek ka paralajmëruar për mot të keq me reshje të vazhdueshme, stuhi dhe mundësi breshëri, duke këshilluar kujdes të shtuar deri të premten.