Një stuhi intensive goditi Elbasanin, duke shkaktuar përmbytje në rreth 30 banesa dhe 20 bodrume brenda vetëm 30 minutave, me reshje prej 60 milimetrash shiu. Dëmet më të mëdha u regjistruan në automjetet e parkuara në parkimet nëntokësore, ku uji depërtoi shpejt dhe shkaktoi dëmtime të shumta. Reshjet e dendura rrëzuan gjithashtu 10 pemë në qytet dhe sollën materiale në disa akse rrugore, duke vështirësuar qarkullimin dhe kërkuar ndërhyrje të menjëhershme nga ekipet e emergjencës dhe shërbimeve publike. Pavarësisht dëmeve materiale, nuk raportohet asnjë person i lënduar, ndërsa strukturat vendore vazhdojnë evidentimin dhe pastrimin e zonave të prekura.