Pasditen e së mërkurës, Shkupi u përfshi nga një stuhi e fuqishme që shkaktoi përmbytje në rrugë, vetura të bllokuara dhe pemë të rrëzuara. Komuna e Çairit reagoi menjëherë duke aktivizuar Shtabin e Krizave dhe duke vendosur në terren ekipe të ndryshme për të monitoruar dhe përballuar situatën. Shërbimet komunale do të jenë në dispozicion gjatë gjithë natës për të intervenuar në çdo rast emergjent, ndërsa qytetarët janë apeluar të shmangin lëvizjet e panevojshme dhe të bashkëpunojnë me autoritetet. Gjithashtu, qytetarët inkurajohen të raportojnë pengesat në rrugë në numrin 112 për të mundësuar ndërhyrjen e shpejtë dhe përmirësimin e sigurisë në zonat e prekura.