Evropa po përballet me një valë të re të vapës ekstreme, e cila filloi nga jugperëndimi i kontinentit dhe pritet të përhapet drejt Evropës Qendrore, Italisë dhe Ballkanit. Kjo valë e të nxehtit shkaktohet nga një fushë e fuqishme presioni të lartë atmosferik, e njohur si "kupola e nxehtësisë", që bllokon ajrin e freskët dhe mban temperaturat shumë të larta për periudha të gjata. Në Ballkan, temperaturat mund të arrijnë deri në 40 gradë Celsius, duke krijuar kushte të vështira, veçanërisht në qytetet ku nxehtësia mbahet nga asfaltet dhe ndërtesat. Rreziku për zjarre dhe probleme shëndetësore si dehidrim dhe goditje nga nxehtësia është në rritje, ndërsa kjo periudhë e vapës pritet të zgjasë deri në mesin e korrikut.