Agjencia për Parandalimin e Korrupsionit (APK) njoftoi se mbi 10,200 zyrtarë publikë kanë deklaruar pasurinë për vitin 2025 brenda afatit ligjor, ndërsa rreth 140 zyrtarë nuk e kanë përmbushur këtë obligim deri më 31 mars 2026. Procesi i deklarimit u zhvillua sipas afateve ligjore, pa parashikim për shtyrje të afatit, dhe të dhënat janë ende preliminare deri në përfundimin e verifikimit. APK ka nisur veprimet për zyrtarët që nuk kanë respektuar afatin, duke përfshirë shqiptimin e gjobave në vlerë prej 30% të pagës mujore dhe paralajmëron masa më të rënda në rast të mosrespektimit të detyrimit edhe pas gjobave. Në rastet e përsëritura, Agjencia mund të procedojë me kallëzime penale që përfshijnë burgim nga gjashtë muaj deri në pesë vjet dhe konfiskim të pasurisë së fituar në mënyrë të paligjshme.