Deputeti i PDK-së, Artan Behrami, ka shprehur shqetësime lidhur me mundësinë që kryeministri në detyrë, Albin Kurti, të shpallë gjendjen e jashtëzakonshme në Kosovë më 16 shtator, ditën kur pritet të merret vendimi për ish-krerët e Ushtrisë Çlirimtare të Kosovës në Hagë. Behrami e ka cilësuar një veprim të tillë si shkatërrues, duke theksuar se në mungesë të institucioneve të konstituuara, shpallja e gjendjes së jashtëzakonshme mund të përdoret për të parandaluar tubimet dhe protestat masive. Ai gjithashtu ka ngritur dyshime se Kurti mund të ketë plane për të "paralizuar Kosovën" dhe ka bërë thirrje për rezistencë kundër këtij skenari, duke paralajmëruar rrezikun e kthimit të vendit në një shtet autoritar. Analisti dhe ish-ambasadori Lulzim Peci ka shprehur frikë nga një skenar i tillë, duke paralajmëruar se shpallja e gjendjes së jashtëzakonshme pa bazë ligjore do të komplikonte më tej situatën politike dhe sociale në Kosovë.