Sot në Kosovë shënohet 27-vjetori i ndërhyrjes së NATO-s, e cila kishte për qëllim ndalimin e spastrimit etnik gjatë luftës së fundit në Kosovë. Në sheshin e Prishtinës është hapur një ekspozitë që paraqet të gjitha masakrat serbe të kryera gjatë viteve 1998-1999, bazuar në librin “Masakrat në Kosovë 1998-1999”, botuar në vitin 2024 nga ADMOVERE dhe INTEGRA. Ekspozita paraqet ngjarjet në mënyrë kronologjike dhe në dy gjuhë, shqip dhe anglisht, duke u bërë homazh viktimave dhe duke nderuar familjet e tyre. Gjatë luftës forcat serbe-jugosllave kryen një sërë krimesh, përfshirë masakra, vrasje, zhdukje, dhunime, tortura, plaçkitje, arrestime arbitrare dhe dëbime të dhunshme të popullsisë civile, si dhe shkatërrime të pasurive dhe institucioneve.