Në një akademi jubilare nën patronatin e kryeministrit Albin Kurti u përkujtua 30-vjetori i ndarjes nga jeta i veprimtarit të shquar të çështjes kombëtare, Halil Alidema. Kurti theksoi rëndësinë simbolike të mbajtjes së këtij përkujtimi në Institutin e Historisë “Ali Hadri”, duke lidhur jetën dhe veprimtarinë e Alidemës me Universitetin e Prishtinës dhe ndikimin e historianit Ali Hadri në formimin e tij. Ai kujtoi rolin e rëndësishëm të Alidemës në betejat për liri dhe shtetndërtim, si dhe sakrificën e tij pas demonstratave të vitit 1981, që sollën dënimin me burg të gjatë. Në emër të familjes, vajza e tij Yllka Alidemaj e përshkroi Halil Alidemën si një udhërrëfyes të qëndresës dhe dashurisë për atdheun, duke theksuar se trashëgimia e tij i përket gjithë kombit shqiptar dhe vazhdon të frymëzojë për ruajtjen e idealit të lirisë dhe shtetit.