Më 7 shtator 1990, 80 nga 111 delegatët e Kuvendit të Kosovës u mblodhën fshehtas në Kaçanik për të shpallur Kosovën Republikë dhe për të miratuar Kushtetutën e saj, duke iu kundërvënë regjimit të Serbisë që një vit më parë kishte suprimuar autonominë e Kosovës. Ky akt politik dhe juridik shënoi krijimin e Republikës së parë të Kosovës, e cila u bë simbol i rezistencës, fillimisht paqësore dhe më pas të armatosur, duke kulmuar me luftën e Ushtrisë Çlirimtare të Kosovës në vitet 1998-1999. Më 17 shkurt 2008, kjo republikë e shpallur në Kaçanik u ripërtëri si shtet i pavarur, sovran dhe demokratik, i njohur nga mbi 120 vende të botës. Kryeministri në detyrë Albin Kurti ka përkujtuar këtë përvjetor duke shprehur mirënjohje për brezin që kontribuoi në këtë rrugëtim historik dhe duke uruar për të ardhmen politike të Kosovës.