Eugen Cakolli nga Instituti Demokratik i Kosovës shpjegon se Albulena Haxhiu mund të vazhdojë të ushtrojë detyrën e ushtrueses së Presidentes edhe pas marrjes së mandatit si deputete, për shkak se seanca konstituive e Kuvendit nuk është përmbyllur ende me zgjedhjen e kryetarit dhe nënkryetarëve. Sipas tij, mandati i deputetit fillon me certifikimin e rezultateve nga KQZ, por funksionet e kryesisë së legjislaturës paraprake vazhdojnë deri në përmbylljen e seancës konstituive. Ai thekson se në mungesë të zgjedhjes së kryetarit të Kuvendit, Haxhiu mbetet në detyrë, pasi nuk ka pozitë tjetër kushtetuese që mund ta marrë këtë funksion. Cakolli nënvizon gjithashtu se moskonstituimi i Kuvendit brenda afatit 30 ditor mund të çojë në pasoja serioze kushtetuese dhe kërkon që kjo çështje të dërgohet në Gjykatën Kushtetuese për të sqaruar pasojat ligjore dhe për të parandaluar bllokimin e institucioneve.