Afati kushtetues për konstituimin e Kuvendit të Kosovës ka kaluar pa rezultat, pasi Kuvendi nuk u konstituua në plotni dhe Lëvizja Vetëvendosje nuk propozoi emër për kryetar. Aktgjykimi i Gjykatës Kushtetuese parashihte përmbylljen e këtij procesi më 7 gusht, por kjo nuk u realizua, duke rikthyer skenarin e seancave të shpeshta çdo 48 orë si vitin e kaluar. Njohësi i Kushtetutës, Ditar Kabashi, shpjegon se mungesa e sanksioneve për moskonstituimin e Kuvendit krijon një situatë të pazakontë, ku ligjvënësit nuk penalizohen për tejkalimin e afateve. Aktualisht, Kuvendi po tenton për të dytën herë të zgjedhë kryetarin dhe nënkryetarët, ndërsa kryetari i Vetëvendosjes, Albin Kurti, kërkon kohë shtesë për të negociuar me partitë e tjera lidhur me çështjen e presidentit.