Aleanca për Ardhmërinë e Kosovës (AAK) ka pezulluar zgjedhjet e brendshme të partisë, të cilat sapo kishin filluar, për shkak të shpërndarjes së Kuvendit dhe zgjedhjeve parlamentare të jashtëzakonshme që pritet të mbahen së shpejti. Këshilli i Përgjithshëm i AAK-së mori vendimin me votë unanime, duke theksuar nevojën për t'u përqendruar plotësisht në procesin zgjedhor nacional. Pezullimi do të zgjasë deri dy javë pas përfundimit të zgjedhjeve parlamentare, ndërsa Shtabi Qendror Zgjedhor i partisë do të udhëhiqet nga nënkryetari Ardian Gjini. Ky i fundit pritet të marrë edhe postin e kryetarit të partisë, pasi Ramush Haradinaj kishte njoftuar më parë se nuk do të kandidojë për një mandat të ri.