Aleanca për Ardhmërinë e Kosovës (AAK) ka konfirmuar se do të garojë e vetme në zgjedhjet parlamentare të 7 qershorit 2026, pa u bashkuar me asnjë parti tjetër në koalicion. Ish-deputeti Besnik Tahiri deklaroi për Ekonomia Online se vendimi është marrë që herët dhe se AAK-ja do të paraqesë një listë kandidatësh “bukur konkurruese”, duke përfshirë kuadro të partisë dhe emra të rinj. Ai theksoi se Aleanca është më e fortë kur garon me logon dhe kauzën e vet, duke përmendur se mësimet nga koalicionet e kaluara nuk kanë qenë pozitive. Kandidati për kryeministër do të jetë Ardian Gjini, ndërsa detajet e tjera të listës pritet të publikohen së shpejti, menjëherë pas përfundimit të afatit për certifikimin e koalicioneve nga Komisioni Qendror i Zgjedhjeve.