Këshilli i Marrëdhënieve Shqiptaro-Amerikane (AARC) ka shprehur shqetësim të thellë për krizën institucionale që po vazhdon në Kosovë prej më shumë se një viti, duke theksuar se partitë politike nuk po vendosin interesat kombëtare mbi axhendat e ngushta partiake dhe rivalitetet personale. AARC vlerëson se Kosova ka bërë përparime të rëndësishme që nga pavarësia, falë sakrificës dhe partneriteteve me Shtetet e Bashkuara dhe botën demokratike, dhe këto përparime nuk duhet të rrezikohen nga lojërat politike apo dobësimi i institucioneve shtetërore. Në një mjedis global të pasigurt, Kosova duhet të tregojë se është një partner i fortë dhe i besueshëm për aleatët e saj, ndërsa udhëheqësit politikë kanë përgjegjësi të sigurojnë funksionimin efektiv të institucioneve demokratike dhe të vendosin interesin kombëtar mbi atë partiak. AARC bën thirrje për veprim urgjent dhe me burrë shteti nga të gjitha partitë dhe udhëheqësit në Kosovë për të dhënë fund ngërçit politik dhe për të rivendosur stabilitetin dhe funksionalitetin që meritojnë qytetarët.