Kryetari i Lidhjes Demokratike të Kosovës, Lumir Abdixhiku, zhvilloi një takim me ministren për Evropën dhe Punët e Jashtme të Shqipërisë, Elisa Spiropali, ku u diskutuan zhvillimet politike rajonale dhe sfidat e sigurisë. Në fokus ishte rëndësia e koordinimit të vazhdueshëm ndërmjet Kosovës dhe Shqipërisë në proceset integruese euroatlantike, si dhe nevoja për një qëndrim të unifikuar ndaj partnerëve ndërkombëtarë. Abdixhiku theksoi marrëdhënien e veçantë mes dy vendeve, të ndërtuar mbi histori, vlera dhe aspirata të përbashkëta, dhe përgjegjësinë për të kontribuar në paqen dhe perspektivën evropiane të rajonit. Ai nënvizoi gjithashtu rëndësinë e bashkëpunimit institucional, dialogut politik të rregullt dhe përkrahjes reciproke në rrugën drejt integrimit evropian dhe euroatlantik, duke e cilësuar këtë bashkëpunim si një shtyllë strategjike për të ardhmen dhe rolin ndërkombëtar të dy vendeve.