Sipas Vullent Bugaqkut nga Instituti Demokratik i Kosovës, nga fillimi i gushtit deri në fillim të tetorit duhet të përfundojnë proceset e konstituimit të Kuvendit, formimit të Qeverisë dhe zgjedhjes së presidentit të ri. Afatet kushtetuese dhe vendimet e Gjykatës Kushtetuese përcaktojnë që Kuvendi duhet të konstituohet brenda 30 ditëve pas certifikimit të rezultateve, që pritet të ndodhë më 6 korrik. Pas konstituimit, brenda 60 ditëve duhet të zgjidhet presidenti i ri, duke bërë të domosdoshme një marrëveshje politike dhe kompromis mes partive. Bugaqku thekson se numrat aktualë në Kuvend kërkojnë bashkëpunim dhe konsensus për të siguruar funksionimin e institucioneve të reja.