Më 30 maj 2026 mbyllet afati për aplikimet online për akreditimin e vëzhguesve dhe mediave që do të monitorojnë zgjedhjet e 7 qershorit në Kosovë. Komisioni Qendror i Zgjedhjeve (KQZ) ka bërë të ditur se për të aplikuar mund të jenë subjektet politike të certifikuara, OJQ-të, organizatat qeveritare dhe ndërkombëtare, mediat dhe përfaqësuesit e vendeve të huaja. Programi për vëzhguesit ndërkombëtarë synon të prezantojë sistemin zgjedhor të Kosovës dhe t’u mundësojë atyre të ndjekin nga afër të gjitha fazat e procesit zgjedhor, duke përfshirë shpërndarjen e materialeve, hapjen e vendvotimeve, votimin dhe numërimin e fletëvotimeve. KQZ thekson rëndësinë e vëzhgimit për garantimin e transparencës dhe besueshmërisë së zgjedhjeve, duke e konsideruar atë një mekanizëm kyç për rritjen e besimit të qytetarëve ndaj procesit zgjedhor.