Partitë politike të regjistruara në Kosovë kanë afat deri më 7 maj për të njoftuar Komisionin Qendror të Zgjedhjeve (KQZ) nëse do të marrin pjesë në zgjedhjet e parakohshme për Kuvendin e Kosovës. Ky obligim vlen për 53 partitë e regjistruara dhe përfshin edhe njoftimin nëse do të garojnë si pjesë e koalicioneve, të cilat duhet të përbëhen nga së paku dy parti dhe nuk mund të tërhiqen pas certifikimit. Përveç kësaj, KQZ ka caktuar periudhën zyrtare të fushatës zgjedhore që nis më 28 maj dhe përfundon më 7 qershor, ndërsa shorti për renditjen në fletëvotim do të mbahet më 16 maj. Në ditët në vijim, do të fillojë edhe procesi i akreditimit të vëzhguesve dhe mediave, regjistrimi i votuesve jashtë vendit, si dhe hapja e platformës elektronike për ndryshimin e qendrës së votimit dhe kundërshtimin e pasaktësive në listën votuese.