Në ambientet e Akademisë së Shkencave dhe të Arteve të Kosovës u mbajt konferenca shkencore me temën “Ndryshimet Gjeopolitike dhe Sfidat për Shtetin e Kosovës”, ku morën pjesë akademikë dhe studiues nga Kosova, Shqipëria dhe Maqedonia e Veriut. Iniciator dhe organizator i kësaj konference ishte ish-ministri i Arsimit, Arsim Bajrami, i cili theksoi rëndësinë e angazhimit të komunitetit akademik për të ofruar analiza dhe vizione strategjike në një periudhë të transformimeve ndërkombëtare. Gjatë konferencës, Bajrami prezantoi kumtesën e tij ku trajtoi ndikimin e rendit të ri ndërkombëtar, dinamikat e sigurisë, proceset integruese euroatlantike dhe sfidat ndaj sovranitetit dhe integritetit territorial të Kosovës. Ai nënvizoi nevojën për forcimin e kapaciteteve kushtetuese, institucionale dhe diplomatike të shtetit, duke theksuar rolin kyç të dialogut shkencor në ndërtimin e politikave publike dhe mbrojtjen e interesave strategjike të Kosovës.