Aleanca Kosovare e Bizneseve (AKB) ka theksuar rëndësinë jetike të ruajtjes së marrëdhënieve strategjike me Shtetet e Bashkuara të Amerikës, duke kërkuar nga institucionet e Kosovës të veprojnë me përgjegjësi, koordinim dhe maturi në këtë drejtim. AKB paralajmëron se çdo sfidë apo ftohje në raportet me SHBA-në mund të ndikojë jo vetëm në aspektin diplomatik dhe politik, por edhe në klimën e investimeve dhe zhvillimin ekonomik të vendit. Kryetari i AKB-së, Agim Shahini, nënvizon se Kosova duhet të mbrojë sovranitetin dhe rendin kushtetues, ndërkohë që duhet të ndërtojë politika të mençura dhe të koordinuara me aleatët ndërkombëtarë, duke respektuar zotimet e marra në proceset ndërkombëtare. Sipas Shahinit, vetëm përmes unitetit institucional dhe partneritetit të fortë me SHBA-në dhe aleatët e tjerë, Kosova mund të sigurojë një të ardhme më të sigurt, të zhvilluar dhe të begatë për qytetarët e saj.