Driton Alaj, aktivist i njohur nga rajoni i Dukagjinit, i është bashkuar Aleancës për Ardhmërinë e Kosovës, duke nisur një rrugëtim të ri politik. Lajmin e bëri të ditur Daut Haradinaj përmes një postimi në Facebook, ku vlerësoi prejardhjen dhe angazhimin e Alajt si pjesë e një familjeje që ka dhënë kontribut të çmuar në zhvillimin e demokracisë në Kosovë. Familja e Alajt ka qenë mbështetëse e palëkundur e presidentit historik Ibrahim Rugova dhe vlerave që ai përfaqësonte. Sipas Haradinajt, aderimi i Alajt përfaqëson një vlerë të shtuar për Aleancën në një kohë kur partia po zgjerohet me figura dhe aktivistë të përkushtuar nga rajone të ndryshme të vendit.