Aktivistja feministe dhe autore Adelina Tërshani i është bashkuar Lëvizjes Vetëvendosje dhe do të kandidojë për deputete në legjislaturën e ardhshme të Kuvendit të Kosovës, njoftoi kryetari i partisë, Albin Kurti. Ai theksoi se Tërshani sjell një përvojë mbi dhjetëvjeçare në mbrojtje të të drejtave të grave, të rinjve dhe komuniteteve të margjinalizuara, duke kombinuar aktivizmin shoqëror me punën konkrete në terren dhe hulumtimin e politikave publike. Me formim akademik në Gazetari dhe Menaxhim të Konflikteve në Itali, ajo përfaqëson një zë intelektual dhe kritik që do të pasurojë programin e Vetëvendosjes për drejtësi shoqërore. Kurti shtoi se përmes angazhimit të saj në institucione dhe art si formë rezistence, Adelina do të vazhdojë betejën për barazi edhe brenda Kuvendit të Kosovës.