Deputetja e Aleancës për Ardhmërinë e Kosovës, Time Kadrijaj, ka sulmuar ashpër kryeministrin në detyrë, Albin Kurti, duke e akuzuar për përdorimin e një “luftë hibride” ndaj kundërshtarëve politikë. Ajo pretendon se Kurti përdor profile me adresa të rreme për të frikësuar deputetët dhe opozitën, duke tentuar të denigrojë çdo qytetar që nuk mbështet Lëvizjen Vetëvendosje. Kadrijaj thekson se opozita nuk do të trembet dhe sfidon ata që përdorin identitete false të dalin me emra të vërtetë dhe të përballen me realitetin. Më tej, ajo akuzon Kurtin për shkelje të Kushtetutës, abuzim me shtetin dhe përfshirje në afera kriminale dhe korruptive, duke deklaruar se vendi i tij është në burg për këto veprime.