Organizata Albanians for America ka përgëzuar qytetarët, institucionet dhe partitë politike të Kosovës për zhvillimin e zgjedhjeve të parakohshme në një atmosferë demokratike, paqësore dhe të rregullt. AFA vlerëson se procesi dëshmoi pjekurinë demokratike të qytetarëve dhe shprehjen e lirë të vullnetit në përputhje me standardet ndërkombëtare. Pas zgjedhjeve, organizata bën thirrje për përgjegjësi shtetërore, dialog konstruktiv dhe kompromis për formimin e institucioneve të reja, duke theksuar nevojën për zgjedhjen në kohë të presidentit dhe krijimin e një qeverie stabile. AFA rithekson mbështetjen për rrugëtimin euroatlantik të Kosovës dhe nënvizon se stabiliteti politik është kyç për zhvillimin ekonomik dhe subjektivitetin ndërkombëtar të vendit.