Kryeministri në detyrë i Kosovës, Albin Kurti, vizitoi panairin “Gratë në Biznes” në sheshin “Nënë Tereza” në Prishtinë, ku u njoh me produktet artizanale, ushqimore dhe krijimet kreative të grave ndërmarrëse. Ai falënderoi gratë për përkushtimin e tyre dhe u uroi suksese në zhvillimin e bizneseve të tyre, duke theksuar rëndësinë e rolit të tyre në fuqizimin ekonomik të vendit. Kurti gjithashtu përmendi mbështetjen e Qeverisë së Kosovës për gratë ndërmarrëse, duke përfshirë programet që synojnë përkrahjen e bizneseve prodhuese vendore dhe zhvillimin e ndërmarrësisë. Panairi u organizua nga Ministria e Industrisë, Ndërmarrësisë, Tregtisë dhe Inovacionit në bashkëpunim me Agjencinë për Investime dhe Përkrahjen e Ndërmarrjeve në Kosovë (KIESA).