Mandati pesëvjeçar i Vjosa Osmanit si presidente e Kosovës dhe komandante supreme e Forcave të Sigurisë së Kosovës përfundon më 4 prill 2026. Pas kësaj date, kompetencat dhe përgjegjësitë e presidentes, përfshirë komandën supreme të FSK-së, do t’i kalojnë ushtruese së detyrës së presidentes, kryetares së Kuvendit, Albulena Haxhiu. Edhe pse Haxhiu do të jetë në këtë pozitë si ushtruese detyre dhe jo me mandat të plotë, ajo do të ketë të gjitha kompetencat kushtetuese për të ushtruar këtë funksion, përfshirë edhe shpalljen e gjendjes së jashtëzakonshme në rast nevoje. Sipas Kushtetutës së Kosovës, posti i ushtruesit të detyrës së presidentit nuk mund të mbahet për më shumë se gjashtë muaj.