Aleanca ka kërkuar nga Lëvizja Vetëvendosje dhe Lidhja Demokratike e Kosovës transparencë të plotë për marrëveshjen e mundshme për zgjedhjen e presidentit konsensual. Deputetja Time Kadrijaj theksoi se Aleanca nuk do të pengojë një marrëveshje mes dy partive, por kërkon garanci për gjashtë pika kyçe, përfshirë edhe zhbërjen e Ligjit për Shtetësinë dhe respektimin e Kushtetutës. Deputeti Burim Ramadani theksoi se për Aleancën më e rëndësishme është përmbajtja e marrëveshjes, veçanërisht nëse Kosova do të përfshihet në projektin e gazit amerikan dhe zhvillimet në sektorin energjetik. Ai gjithashtu akuzoi Lëvizjen Vetëvendosje për "zhvatje buxhetore" me rreth 463 të emëruar politikë që vazhdojnë të paguhen në mënyrë jokushtetuese, duke kërkuar hetim nga Prokuroria.