Një ditë para seancës konstituive të Kuvendit, Aleanca mblidhet sot në orën 18:00 për të diskutuar dhe vendosur nëse deputetët e saj do të marrin pjesë në këtë seancë, e cila është planifikuar të mbahet më 9 shtator në orën 11:00. Deri tani, Aleanca ka mbajtur qëndrim kritik ndaj mënyrës së zhbllokimit të procesit dhe fillimisht ka pasur një qëndrim për të mos marrë pjesë në seancë. Mbledhja e Kryesisë do të pasohet nga një konferencë për media në orën 19:00, ku kryetari Ardian Gjini do të bëjë të ditura vendimet dhe zhvillimet e fundit të partisë. Ky zhvillim vjen pas kërkesave të Aleancës dhe PDK-së për nisjen e procesit të konstituimit të Kuvendit, i cili është thirrur më shumë se një muaj pas kalimit të afatit kushtetues.