Ambasadori i Mbretërisë së Bashkuar në Kosovë, Jonathan Hargreaves, është takuar me ministrin për Digjitalizim dhe Administratë Publike, Lulëzon Jagxhiu, ku kanë diskutuar për reformat dhe digjitalizimin e shërbimeve publike në vend. Gjatë takimit u përmendën planet ambicioze të qeverisë për modernizimin e administratës dhe përpjekjet për rekrutime të bazuara në meritë në sektorin publik, një proces që Mbretëria e Bashkuar e ka mbështetur prej kohësh në Kosovë. Po ashtu, u diskutua edhe për bashkëpunimin në forcimin e sigurisë kibernetike, duke theksuar rëndësinë e këtij aspekti në epokën digjitale. Ambasadori Hargreaves shprehu kënaqësinë për bashkëpunimin e mëparshëm me Jagxhiun dhe për mundësinë e vazhdimit të tij në detyrën e tij të re ministrore.