Ambasadori i Shqipërisë në Kosovë, Petrit Malaj, vizitoi Qendrën Kombëtare për Menaxhim Kufitar (QKMK) ku u prit nga drejtuesit e saj. Gjatë takimit u prezantuan mekanizmat dhe kapacitetet e menaxhimit të integruar të kufirit, me theks të veçantë në koordinimin 24/7 të institucioneve përgjegjëse për sigurinë kufitare. Ambasadori vlerësoi profesionalizmin e stafit dhe e cilësoi QKMK-në si një model të avancuar bashkëpunimi institucional në rajon, duke theksuar rëndësinë e saj në parandalimin e aktiviteteve kundërligjshme. Ai gjithashtu rikonfirmoi gatishmërinë për të vazhduar mbështetjen dhe bashkëpunimin në projektet që forcojnë bashkëpunimin ndërkufitar dhe ndërshtetëror.