Shtetet e Bashkuara po përpiqen të shkëpusin Kishën Ortodokse Serbe nga ndikimi rus dhe ta afrojnë atë me Kishën Greke dhe Patriarkanën Ekumenike në Stamboll, në kuadër të një projekti të gjerë gjeopolitik. Në këtë kontekst, po diskutohet edhe dhënia e një statusi të veçantë për Kishën Ortodokse Serbe në Kosovë, që do të sigurojë autonomi dhe ekstraterritorialitet, duke garantuar liri të plotë lëvizjeje për klerikët dhe mbrojtje të pronave të kishës. Historiani Dushan Janjiq thekson se qeveria e Kosovës duhet të rishikojë kufizimet e vendosura ndaj kishës dhe se administrata amerikane do të përfshihet më thellë në këtë proces gjatë muajit gusht. Ndërkohë, ideja e Asociacionit të komunave me shumicë serbe është hedhur poshtë, duke u zëvendësuar me krijimin e një Këshilli Kombëtar Serb, në përputhje me modelet ekzistuese për komunitetet e tjera në rajon.