Ministri i Mbrojtjes së Kosovës, Ejup Maqedonci, zhvilloi një takim me kryetarin e Komisionit për Mbrojtje në Bundestagun gjerman, Thomas Röwekamp, ku u diskutua avancimi i bashkëpunimit në fushën e sigurisë dhe objektivat strategjike të përbashkëta. Maqedonci falënderoi Gjermaninë për mbështetjen e vazhdueshme ndaj misionit të KFOR dhe theksoi rolin e Kosovës në ruajtjen e paqes dhe stabilitetit rajonal, duke përmendur edhe angazhimet ndërkombëtare të Forcës së Sigurisë së Kosovës. Ai ritheksoi se anëtarësimi në NATO mbetet një objektiv strategjik i Kosovës dhe nënvizoi rëndësinë e mbështetjes nga partnerët ndërkombëtarë për këtë proces. Në përfundim, ministri theksoi se bashkëpunimi ndërmjet Kosovës dhe Gjermanisë po thellohet mbi bazën e vlerave demokratike dhe besimit të ndërsjellë.