Ilir Gashi, anëtar i Komisionit Qendror të Zgjedhjeve (KQZ) nga PDK-ja, ka reaguar ndaj deklaratës së kryeministrit Albin Kurti lidhur me një shkresë të Sekretariatit të KQZ-së për datën e zgjedhjeve të parakohshme. Gashi ka bërë të qartë se KQZ-ja si institucion nuk ka diskutuar as nuk ka miratuar ndonjë vendim për t’i propozuar presidentes një datë për zgjedhjet e parakohshme të dhjetorit 2025. Ai ka shtuar se KQZ-ja ka qenë e gatshme për organizimin e zgjedhjeve si më 21 ashtu edhe më 28 dhjetor, por nuk është pyetur zyrtarisht për përcaktimin e datës. Gashi ka theksuar se çdo shkresë apo rekomandim lidhur me datën e zgjedhjeve që është bërë, ka qenë vetëm personal dhe nuk përfaqëson qëndrim zyrtar të KQZ-së, duke i bërë kështu një demantim të qartë kryeministrit Kurti.