Ish-kongresmeni amerikan Joseph DioGuardi i është drejtuar liderëve politikë të Kosovës me një letër ku bën thirrje për konsensus në zgjedhjen e presidentit të ardhshëm, duke theksuar se vendi nuk mund të përballojë një tjetër cikël bllokadash institucionale dhe zgjedhjesh të përsëritura. Ai propozon Faton Bislimin si kandidat për president, duke e cilësuar atë si një figurë të aftë për të bashkuar vendin dhe për të përfaqësuar interesat e të gjithë qytetarëve, pa u ndikuar nga preferencat politike apo personale. DioGuardi nënvizon rëndësinë e një presidenti me karakter, pavarësi dhe gjykim të shëndoshë, i cili mund të ndërtojë ura mes forcave politike dhe komuniteteve të ndryshme në Kosovë. Letra është dërguar katër partive më të mëdha në vend, duke kërkuar që emri i Bislimit të shqyrtohet me seriozitet dhe mbi bazën e meritave të tij, në një moment kur Kosova ka nevojë më shumë se kurrë për unitet dhe institucione funksionale.