Komisioni Qendror i Zgjedhjeve (KQZ) ka njoftuar se procesi i aplikimit për akreditimin e vëzhguesve dhe mediave për zgjedhjet e parakohshme të Kuvendit të Kosovës, të planifikuara më 7 qershor 2026, është ende i hapur dhe do të vazhdojë deri më 30 maj. Gjatë kësaj periudhe 26-ditore, subjekte politike, organizata joqeveritare, qeveritare, ndërkombëtare, mediat dhe përfaqësuesit e shteteve të huaja mund të aplikojnë online për të marrë akreditimin e nevojshëm. Procesi i aplikimit përfshin plotësimin e të dhënave në platformën online të KQZ-së dhe më pas shqyrtimin dhe miratimin e aplikimit nga Zyra për Regjistrim, Certifikim dhe Kontrollin Financiar të Subjekteve Politike. Pas miratimit, përfaqësuesit e autorizuar do të marrin kredencialet për të vazhduar me regjistrimin e personave që do të jenë vëzhgues apo pjesë e mediave gjatë zgjedhjeve.