Kuvendi konfirmoi dorëheqjen e zëvendëskryeministrit për Qeverisje të Mirë, Arben Fetai, i cili njoftoi largimin më 1 qershor përmes rrjeteve sociale. Në postimin e tij në Facebook, Fetai theksoi se largohet me ndërgjegje të pastër dhe me kokën lart, duke e konsideruar këtë hap si më të drejtin dhe dinjitozin në kushtet aktuale. Ai falënderoi të gjithë ata që e mbështetën dhe bashkëpunuan me të gjatë dy viteve në përpjekjet për reforma në llogaridhënie, transparencë dhe sundim të ligjit. Megjithatë, Fetai shprehu se kushtet e nevojshme për të vazhduar me efikasitet nuk ekzistojnë më, prandaj vendosi të largohet nga pozicioni i tij.