Ministri në detyrë i Punëve të Brendshme, Xhelal Sveçla, ka përshëndetur arrestimin e shtatë personave të nacionalitetit serb në Graçanicë, të dyshuar për ndikim të paligjshëm në vullnetin e lirë të votuesve përmes kërcënimeve, presioneve dhe shantazhit. Ai ka theksuar se këto veprime janë pjesë e direktivave të orkestruara nga Serbia, të cilat cenojnë pluralizmin politik dhe rendin demokratik në Kosovë. Sveçla ka garantuar se institucionet e Kosovës do të veprojnë me vendosmëri për të mbrojtur procesin zgjedhor nga çdo përpjekje për frikësim apo deformim të vullnetit politik të qytetarëve, duke siguruar integritetin dhe lirinë e zgjedhjeve. Në këtë kontekst, ai ka vënë në dukje se pavarësisht sfidave dhe bllokadave politike, zgjedhjet në Kosovë vazhdojnë të vlerësohen pozitivisht nga raportet ndërkombëtare për standardet e tyre të larta.