Profesori universitar dhe ish-zyrtari i lartë institucional, Arsim Bajrami, ka njoftuar tërheqjen e kandidaturës së tij për president të Republikës së Kosovës. Ai vendosi të tërhiqet pasi dy partitë kryesore parlamentare, Lëvizja Vetëvendosje dhe Partia Demokratike e Kosovës, nuk e përkrahën konceptin e një kandidati konsensual. Bajrami theksoi se vetëofrimi i tij kishte për qëllim tejkalimin e krizës politike dhe institucionale në vend, duke vënë në dispozicion përvojën e tij mbi tri dekada në proceset shtetndërtuese. Ai falënderoi mbështetësit dhe shprehu gatishmërinë për të kontribuar në forcimin e institucioneve demokratike, pavarësisht tërheqjes nga gara presidenciale.