Koalicioni i OJQ-ve për Mbrojtjen e Fëmijëve (KOMF) ka reaguar pas publikimit të rezultateve të Testit të Arritshmërisë, të cilat tregojnë mungesë të progresit në cilësinë e arsimit parauniversitar në Kosovë. Arritshmëria mesatare e nxënësve këtë vit është vetëm 48.35%, duke reflektuar regres krahasuar me vitet e mëparshme dhe duke treguar se nxënësit arrijnë më pak se gjysmën e kërkesave të testit. Sipas KOMF, kjo situatë kërkon analiza të thella dhe masa konkrete për përmirësimin e cilësisë së arsimit, pasi sistemi aktual nuk ka arritur të përmirësohet qëndrueshëm dhe përballet me sfida të shumta, përfshirë mungesën e infrastrukturës adekuate, dhunën në shkolla dhe mungesën e personelit profesional.