Arben Taravari, kryetari i Aleancës për Shqiptarët, deklaroi se nga 250 milionë euro ndihmë financiare, asnjë euro nuk ka shkuar për kompanitë shqiptare. Ai theksoi se një pjesë e huazuar nga Hungaria ishte dedikuar për kompanitë private, por nga fondet totale të shpërndara me interes të ulët, nuk ka përfituar asnjë kompani shqiptare, përveç një rasti të vetëm për ilaçe. Taravari shtoi se ka pyetur edhe Ministrin e Ekonomisë për këtë çështje, i cili nuk ka dhënë informacion konkret dhe nuk ka demantuar deklaratat e tij. Gjithashtu, ai komentoi përbërjen e VLEN-it, duke theksuar se dy partitë kryesore janë LD dhe BESA, ndërsa partitë e tjera i konsideroi si shoqata kulturore artistike që i bashkëngjiten këtyre dy forcave politike.