Auditorja e Përgjithshme, Vlora Spanca, ka bërë të ditur se vetëm 37% e rekomandimeve të auditimit janë zbatuar plotësisht në sektorët kyç publik, duke evidentuar mangësi të mëdha në efikasitetin e shërbimeve, menaxhimin e projekteve dhe digjitalizimin. Problemet përfshijnë dobësi në planifikimin e projekteve infrastrukturore, qeverisje të dobët në lejet për ndërtim, menaxhim joefikas të energjisë së ripërtëritshme dhe prokurim publik, si dhe sfida në sigurinë e informacionit dhe menaxhimin e të dhënave. Pavarësisht sfidave, Zyra Kombëtare e Auditimit ka vazhduar raportimin në Kuvend, megjithëse mosfunksionimi i rregullt i tij ka ndikuar në dobësimin e llogaridhënies për shpenzimet publike. Gjatë vitit 2025 janë zhvilluar aktivitete me media, shoqëri civile dhe partnerë ndërkombëtarë, ndërsa për vitin 2025-2026 janë planifikuar 145 auditime, me raportet e rregullsisë që do të publikohen deri në fund të qershorit dhe raporti vjetor për buxhetin që pritet të dorëzohet në gusht 2026.