Avokati i Popullit ka shprehur shqetësim lidhur me procesin e uljes retroaktive të koeficienteve të pagave për zyrtarët publik, duke theksuar se kjo mund të cenojë sigurinë juridike dhe pronën e tyre. Ky institucion ka hapur rast zyrtar pas pranimit të disa ankesave dhe ka vlerësuar se ndryshimi i koeficienteve duhet të bëhet në përputhje me Ligjin për Procedurën e Përgjithshme Administrative, gjë që nuk është verifikuar në këtë rast. Avokati i Popullit thekson se veprimet me efekt retroaktiv duhet të bazohen qartë në dispozita ligjore dhe se zyrtarët nuk duhet të ndihen të pasigurt për ndryshimet e pagave pa respektimin e kushteve ligjore. Ai kërkon që institucionet përgjegjëse të veprojnë në përputhje me parimet e sundimit të ligjit dhe pritshmërisë legjitime për të ruajtur besimin dhe sigurinë juridike të punonjësve publikë.