Në seancën përfundimtare të rastit Banjska, avokati mbrojtës i Vladimir Toliqit, Millosh Delleviq, ka fajësuar kryeministrin Albin Kurti për përshkallëzimin e situatës në veri të Kosovës. Ai argumentoi se konflikti i armatosur në Banjskë ka nisur si pasojë e vendimit për targat e regjistrimit, të cilin e cilësoi si një hap të gabuar politik. Sipas Delleviqit, qytetarët serbë kanë përdorur tabela të lëshuara nga Serbia, por politika në Prishtinë synoi t’i ndalojë këto praktika, duke thelluar kështu krizën. Ai theksoi se moszbatimi i politikave të Qeverisë nga serbët dhe vendimet e marra nga autoritetet kosovare kanë përkeqësuar situatën, duke e bërë përgjegjës kryeministrin Kurti për tensionet në veri.